هبل الحزب

الاخ ناظر وقف الازميرلى باشا وكاتب حساباته امشير افندى قرروا حل الوقف بعد ان خربوه وافقروا المستفيدين فقرروا ان يضربوا فركيشة وتفليسة بتوزيع اسهم مجانية لا تساوى قيمة الورق اللى كتبت عليه على المواطنيين فى اكبر نصب و عملية احتيال تاريخية لاعادة توزيع الثروة بطريقة حلق حوش

وان خرب بيت ابوك الحق خد لك منه قالب

بيقول لك الاسهم لمن هم فوق 21 سنة بس طبعا الكلام واضح والسبب معروف وهو ليتمكن المواطن المازوم واللى وصل لمرحلة الاكل من الزبالة ليتمكن من بيعها من اليوم الاول وبسعر بخس

يعنى انا افهم خصخصة مارجريت تاتشر ببيع الاسهم للمواطنيين والمواطن يشترى السهم مثلا بالف جنية وهو مايعنى ان تلم الحكومة مليارات تعيد استثمارها بدال ماكل يوم يقول لك الحل فى المستثمر الاجنبى

شوف شكلى وحش ازاى وانا باقول ان الاسهم لا تكون مجانية وباطالب بحرمان الفراء من اسهم مجانية جاية من السماء

والله براوه عل الواد اللى مخمخ النصباية دى

كل ده والمليارات مكدسة فى البنوك من مدخرات المصريين والنظام الاقتصادى العضيم مش عارف يستثمرها

فى هذة الحالة السهم سيكون له قيمة اما السهم المجانى فطبعا معروف بكم سيباع فى الظروف الحالية والناس وصلت لمرحلةفقدان الستر المصرى التاريخى بل والجوع ومذلة الحاجة

فى هذة الحالة يظهر فجاءة ان الحداية بتحدف كتاكيت هى عارفه انها ستستعيدها خلال ايام قليلة

والغريب ان كلامهم لمداعبة الهبل القومى -كلام مايقولوش عيل مدون مهروش ف نافوخة

طيب ياهبل منك له الاسهم حق على اساس المواطنة فشئ غير دستورى ان تحرم من لم يبلغ سن واحد وعشرين سنة من حقة من الاصول فى هذة التفليسة يعنى دى تبقى سرقة علنى واى طعن بالدستورية هيخلص فى جلستين

طيب وانت قررت اسقاط ولاية الدولة عن الاصول والثروة القومية للمواطن فوق 21 سنة فمن اعطالك حق الولاية على نصيب اولادى من الاسهم لتودعها فى صندوق الاجيال

اسهم اولادى القصر انا اللى ولى عليها مش انت ومتزعلش منى ياخ جمال مبارك انت لا استامنك على الحجر عليها واستلاب الولاية وقد تنازلت عنها ولا استامنك على ادارة صندوق الاجيال

ماتزعلش دى مش اهانه انا لا استامنك انا حر - انا شفت ايه اللى جرى من الاستيلاء على الاموال الخاصة بصندوق المعاشات عنوة واقتدارا وصرفها فى غير الهدف اللى مخصصة له بدون اذن اصحابها وهم المشتركين

يبقى معلش انا لا اقبل وصايتك على اسهم اولادى القصر وانا حر فيها دا نصيبهم وانا ولى عليهم

وابيعها انشالله ابيعها بالحشيش زى الشيخ حسنى ماباع البيت بالحشيش فى فيلم الكيت كات مش برضه كان اسمه الشيخ حسنى

——————

دى اصول وثروة قومية بمعنى انه حتى القطاع الخاص اللى بياخد تسهيلات من موارد الدولة-المواطن له نصيب فيه مقابل اختصاصة باستغلال موارد الدولة

خلينى اعطيك مثال بسيط

مصر بتحصل على تاشيرات حج كل سنة

التاشيرات دى بتوزع على شركات السياحة

اول ما ياخذ صاحب كل شركة سياحة على 100 تاشيرة مثلا ممكن يبيعها وهو قاعد فى بيته ب عشرات الالوف يعنى يطلع له كام مليون وهو قاعد

وقيس على كده كل النشاطات الاقتصادية-الامتيازات بتوزع والاحتكارات تمنح والمواطن لايستفيد شئ الا اا اشتغل فى الشركة دى ب 300 جنية فى الشهر

يعنى حتى الحد الادنى للاجور 50 جنية لايراعى ان للمواطن اللى بيشتغل وحتى اللى مابيشتغلش اصلا له حق فى الموارد دى

يعنى اذا كان لايحصل على حقه بموجب العمل 16 ساعة ف اليوم هل سيحصل علية بموجب صكوك جمال مبارك

الاصل ان استغلال موارد الدولة مفروض تكون القوانيين ميالة الى مراعاة حقوق كل الاطراف مش انها تسحل المواطن بكل قوانينها وبعدين تتدعى انها هتوزع كتاكيت

واللى بيحصل النهارده يفكرك بوقف الازميرلى باشا اللى كان ناظر الوقف ناهبه بسوء الادارة

طول النهار فراخ بتكاكى ومفيش بيضة توحد الله

نحل زى الغمام يملا عين الشمس ومفيش نقطة عسل

ولما تييجى المسكينة اللى مفروض تستفيد من الوقف- تحاسب الباشكاتب يطلعها مديونة ويقول هنعطيكم اسهم زى صكوك الريان كده

انت فشلت فى ادارة الوقف- وبدال مانجيب ناظر غيرك- عاوز تعملها تفليسة

لا ويقول لك ان دى يسرى على بعض الشركات ولايسرى على باقى موارد الدولة كالبترول والقناة والمناجم والموانئ وغيرها

ليه لانه بمزاجى ومن غير ليه

واللى ياخد بقشيش المفروض الا يتبطر ولا يناقش

تبيع الصكوك وتفك ازمتك النهاردة وملعون ابو التضخم

اشمعنى يعنى لما نقول الحد الادنى للاجور يصرخوا ويقولوا التضخم

هو عاوز المواطن يبيع حقه فى بلده نهائيا وبعد كده محدش يقول فين حقوقى لان الرد فورا سيكون مانت بعتها واشتريت بتمن الصكوك بتاعتك عيش وغموس للعيال بغرض تخفيف صدمة الغاء الدعم نهائيا باستثناء الخبز والذى ارجح ان يكون الجزء المخفى وراء الموضوع

ودعم ليه بقى انت مش اخدت نصيبك اسهم

يعنى ان يكون استبعاد 70 مليون مواطن من كل حق لهم فى الوطن بموجب توقيعه على بيع الاسهم تانى يوم بعد توفير كل اسباب البيع بثمن بخس

وبعد كده اللى يقول النظام ده غير عادل يتقال له وانت مالك- انت بعت وانتهيت مالكش حاجة عندنا وتبطلوا بقى النق والكلام الوسخ والمعارضة -خلاص انتوا حقكم سقط واحنا اشترينا وانت بعت البيت بالحشيش ياشيخ حسنى كام ملطوش يخدروا المواطن كام شهر

تحس انك بتتقلب-ولازم تعد صوابعك وانت بتتعامل مع الجماعة دول

—————————–

هى دى التحشيشة

تحشيشة مصرية

واحب اقول للاهبل صاحب الفكرة

فكرة كويسة منك ان تخدر المواطنين بالحشيش قبل ما تذبحهم وتقلبهم-معلش احنا بنتقلب

لكن

لو هنقسم ونفضها شركة يبقى نتحاسب

وانا مش هابيع البيت بالحشيش

اوعى تفكر انى زعلان بالعكس

لكنى مقتنع ان ثقافة اهدار القانون والطرمخة والتنازل عن الحقوق والطناش والوعى الزائف والنفاق- هى التى قادتنا الى ما تعرضه وما وصلنا اليه

مقتنع اننا عملنا كده فى انفسنا

كتير كتبوا ان صدام حسين قتل 200 الف عراقى فى مقابر جماعية

يعنى هل مطلوب نتصور ان صدام كان بيمسك السكينة ويدبح الف رقبة كل يوم

عشرات بل مئات الالوف من المواطنيين شاركوا بايديهم وملايين طنشوا وطرمخوا

واحوالنا فى مصر

مئات الالوف وبل الملايين شاركوا فى صنعها او الطرمخة عليها

ملايين يهدرون القانون كل يوم واصبح المبدا السارى هو البقاء للاوسخ

فلو تبنى الحزب الوطنى نفس المبدا

ولو استورد وزير مبيدات مسرطنة

هل يستطيع وزير او حاكم فى النرويج ان يفعل بنا مثل صدام او وزير المبيدات المسرطنة

الصرف الصحى متسرب لمياة الشرب فى كثير من المناطق والمنظفات الصناعية انا اعتقد هى السبب الحقيقى لاغلب حالات الفشل الكلوى والسرطان

هل يمكن ان يحدث ذلك فى دولة فيها شعب يراقب و لايقبل اهدار القانون ويطرمخ بل ويشارك ويستمرئ

اوعى يخدعك الكلام طق الحنك بتاعنا - دى حكومة وسخة وحرامية

احنا مستمرئين وموالسين ومطرمخين

وكل واحد موظف عارف انه بيطنش على اشنع المخالفات والاهدار للكفاءات والقوانيين مقابل حوافز 10 جنية وان يسمح له بالتزويغ وعدم الحضور الا يومين فى الاسبوع

ياعم خالد من كام سنة نشرت فى الصحف(الدستور-العربى الناصرى-) وف التليفزيون المصرى عن موضوع مهم

فقد وجدت ان المستشفى التى كنت اعمل بها فى مصر لا تقوم بتعقييم ابر خياطة الجروح من مريض الى مريض بغرفة الطوارئ، وان كثيرا من اغلب_المستشفيات والمستوصفات اعتادت نفس الممارسة مع خطورة مؤكدة نقل امراض مثل الايدز و فيروسات الكبد، وطول النهار الوزارة بتقول عن فيروس الكبد الوبائى واحنا عارفين كويس مين اللى بينشره ومطنشين

يقول لك ابر البلهارسيا بتاعة زمان - لا وحياة امك احنا عارفين وموالسين ومطنشين

فتقدمت بشكاوى للصحف والى نقيب الاطباء و وزير الصحة ومنظمات حقوق لانسان وجمعيات كتير

كنت بابعت حوالى 200 خطاب واميل يوميا معظمها لاقت الطناش وتكلمت كثيرا وحاربت كثيرا

واحب اقول لك من الاول ان سائقى التاكسى واصحاب محال التصوير للاوراق كانوا بيرفضوا ياخدوا منى فلوس دى جزء مهم لازم اؤكده قيل ما اتكلم فى العك التالى

واحب كمان اؤكد ان كل محلات الحلاقة تبدل موس الحلاقة من واحد للتانى

لكن ازاى ان خمسين الف طبيب شافوا وطنشوا وطرمخوا ان الابر تستعمل من مريض لمريضومنهم ااسلفى الى دقنة مشعثه وطول النهار مصدعنا ان الموسيقى حرام ومنهم المسيحى اللى هار نفسه فى مدارس الاحد ومنهم المثقف العضوى والمناضل بتاع ابصر ايه

كلهم طنشوا واستعبطوا

شئ مخيف

اشنع من الايدز والسرطان

فى جيش اسرائيل كان فيه من رفضوا الخدمة فى الاراضى المحتلة وقتل الفلسطينى وده عدوه اللى بيقول عليه ارهابى ومنهم من دخل السجن دفاعا عن من يعتقد انهم ارهابيين يطلقون الصواريخ على المواطنيين

لكن الطفل اللى اتعور ورايح يخيط الجرح فى مستشفى مصرى لم يسئ ابدا الى الخمسين الف طبيب مطرمخ والمئة الف ممرض وكلهم بيصلوا ومؤمنيين وبيسمعوا عمرو خالد وبيقولوا فوائد البنك حرام والحكومة وسخة وبينادوا بالتغييييير وااننا خير امة اخرجت للناس وانا منهم ومثلهم ولا اختلف عنهم

هنا احنا امام مشكلة اكبر من انا نقول الحكومة مجرمة

دا كان السبب اللى انشاءت عشانة مدونتى

لذلك لما اشوف اتحاد المدونيين يتبنى الشتائم ويدافع عن انتهاك القانون ويطرمخ لازم اتعجب وانا لا اعتبره ترفا

الشتائم هى وسيلة لمنعك من قول الحقيقة ولكى تطرمخ كالمطرمخين-لكنها لاتغضبنى فى حد ذاتها

لكنها سلاح قوى وفعال فى جعل كل التعليقات فى اتجاه اميم واللى بتقوله صح والا سينالك السب والقذف

لذلك فهى اسلوب مهم ومحورى واى واحد ناوى يقول الحقيقة لازم يحاربها ايضا

واللى مش ناوى يقول الحقيقة بيطرمخ ويقول اصل الفيل زعلان ويا سيد

لا

ماهو فى موضوع ابر خياطة الجروح ده اخد كمية شتائم وتهديدات وبلاوى وتحقيقات وخصومات من الراتب ونقل وتنكيل وكل ماتتصوره ولا اتضايقت لكن عرفت ان الباطل بيدافع عن نفسه بها الاسلوب لكن سلاحه الاساسى هو موالسة وطناش الناس وسكوتهم

من سنتين بدا برنامج التعقيم بجدية فى بعض المستشفيات الحكومية لادوات خياطة الجروح وهو يتوسع طبعا انا لا انتحل فضل كهذا لانى مجرد فرد وتاثيرى محدود مهما فعلت

لكن تخيل لو مليون مواطن ارسلوا خطابات فى موضوع معين- الى جهة معينة

تخيل لو 200 طبيب كانوا رفضوا الخياطة بابر ملوثة

لو 2 مليون موظف رفضوا مخالفات فى مكان عملهم فى يوم واحد بتاريخ محدد وكتبوا اعتراضاتهم فى نفس اليوم فى شكاوى رسمية

مررت لأسلم عليك اخى خالد

واترك لك تحية صباحية واستوقفتنى مطولاً هذه الكلمات البسيطة جداً والكبيره جداً جداً

.

.

انا ماعرفش الكلام ده

اللى اعرفه انه اذا كان لك حق ماتسيبوش

اضرب الباب برجلك وادخل

خد حقك

ارادة الناس -ارادة الشعوب لاتقهر- عندما يكون عندها ارادة

.

.

هل هذا الحل ممكن؟

وهل الشعوب ـ الآن ـ تحديداً قادره عليه؟

وجاهزة له؟

وهل هناك ربان قادر ان يقود السفينة عندما تصبح بلا قائد

بمعنى هل هناك بديل افضل مما هو موجود؟ واين هم؟

ام يخرج العربى من حفرة ليقع فى بئر؟

مجرد حيره وسؤال

صباحاتك كل النور

رندا

ولو عجزنا عن القصاص فى الدنيا .. فحقنا لن يضيع عند من بيده ملكوت السماوات والأرض

…………………………

الله أكبر الله أكبر الله أكبر

لا إله إلا الله

الله أكبر الله أكبر

ولله الحمد

لبيك اللهم لبيك .. لبيك لا شريك لك لبيك

عـــــــــيــــــــد ســـــــــــــعــــــــــــــــــــــــــــيـــــد

عيد سعيد على المحاصرين في فلسطين والعراق وأفغانستان

عيد سعيد على المعتقلين في السجون العربية

عيد سعيد على كل الأحرار المقاومين الرافضين للظلم

عيد سعيد على أمة الإسلام

عيد سعيد على الجميع

وكل عام وأنتم بخير